قصة شاب مع بنت عبر الهاتف ليبيانا

سالم وهوا معكس فى إحدى شركات الدولة ,, شاد فيها التوكة الليلية ( حراسات )

وجنبه الهاتف الارضى ,, وفيه الصفر

:::::::::::::::
::::::

::

سالم : - وااااااااااك.. الساعة توا ال 2 و نفخ ل النعى شنى بيفوته الوقت بس لى 8 الصبح الهم لاحرف

التلفزيون مكسد ومافيش فيلم مليح علي ال mbc2

شنى البرنامج توا زعما ما فيش حتي دخّان إنفتوا بيه الوقت

دورة يشبح لى الهاتف ويدير الضحكة

.. خلى نتّصِل بِأي رقم من جماعة ال ليبيانا.. بالك نلقوا واحد نتسهوكوا عليه في هالليل و أهوا نطيروا بيه الكساد شوية

جاري الاتصال ....

-------------

وثواني رد الطرف الأخر ,, والذي كان صوت رجل

سالم: مساء الخير ,, منو عبد المُعطي

الطرف الاخر: منو عبد المُعطي يا خُوي .. لا غَالط

سالم : مش هذا تليفُون عبد المُعطي

الطرف الاخر: تي منو عبد المُعطي.. مش قلنالك غالط

سالم : توا يا عبد المُعطي ادير في روحك مش عبد المُعطي وانت عبد المُعطي يا عبد المُعطي

الطرف الاخر : اللهُم طولِك يا رُوح مش عيب عليك يا راجل توا تقلّق في الناس في إِنفاص الليل .. ما وراكش خدمة الصبح ,, و ما ترقدش في الليل ولا كيف يا كبادي

سالم: ما نرقدش.. شادها قيام الليل أني .. ديرلي روحك توا ماتندري على شئ يا عبد المُعطي وين ال 50 جني اللي نبيهم منك

الطرف الاخر : لا أنت الباين فاضي رسمي ... هي تصبح على خير

---------

سالم : صكر هالمسخ خلى نغيروا الرقم الاخير .. بدل الثلاثة نديروه خمسة .. الوووووووووووو .. منو عبد المعطي

" ويطلع صوت أنثوي من الجهة الاخرى "

الفتاة : لا يا خوي غالط .. هذا مش تليفون عبد المعطي

سالم : أمالا أكيد تليفون أخت عبد المعطي

الفتاة : ولا تليفون أخت عبد المعطي

سالم: امالا اكيد بنت عم عبد المعطي

الفتاة : وااااااااااااااااااك .. ما عندناش حد في العيلة اصلا اسمه عبد المعطي

سالم : باهي مش ناويين تسموا حد عبد المعطي في المستقبل ؟

الفتاة : لا مش ناويين

سالم : اها .. توا زبطتك انتي منو ,, إنتي أكيد بنت شارع عبد المعطي

الفتاة : انت الباين عليك دمك خفيف ..شن إسمك

سالم : اسمي سالم ويدلعوا فيا عبد المعطي

الفتاة : ههههههههههههههه ,, اسمع اني بنرقد توا كلمنى غضوة باهي

سالم بينه وبين نفسه : استنى لى التوكة الجاية وهي بعد غدوة

سالم : أوكي ,,

:
::
:

وجاى اليوم وسالم شاد التوكة

سالم : خلى نتصلو بيها نكسرو عليها اللوز

جاري الاتصال ,,,,

الفتاة : الوووو منو !؟؟

سالم : انى لى اتصلت بيك اول امس فى الليل

الفتاة : مع الساعة قداش اتصلت بيا

سالم : شنى امالا امدايرة جدول

الفتاة : لالا غير مرات اختى راهو

سالم : اتصلت بيك مع الساعة 2 ونص هكى

الفتاة : ايييييييييه عرفتك مش بتتصل بيا امس

سالم : كنت مشغول والله ما فضيتش والنقال امتعى ما فيشى رصيد

الفتاة : آآه باهي

سالم : يِبَهّي أيّامك ويفتحها قِدامك إن شاء الله

الفتاة : إن شاء الله

سالم : ما تعرفناش على اسمك

الفتاة : اسمى نورهان

سالم : عاشت الاسامي

الفتاة : شكرا

سالم : شنى قنينة زى اسمك ؟

الفتاة : اكيدة هادى يا سلومة ما تحكش فيها راسك

سالم : مليح ترا اوصفيلى شكلك

نورهان بينها وبين نفسها : شنى بنقوله توا هذا خلى نسنفزوا عليه بالك يشد معاى واهو نفوتوا بيه الوقت

سالم : الوووووووو معاى انتى

نورهان :اه اه ايه ايه معاك ,, انى بيضة وعيونى كبار وخمشى واقف وقوف تقول خلال ومش سمينة ولا ضعيفة جسمى متناسق

سالم : مشاء الله معناها طرف مش عادي

نورهان : إيه طرف ,,, وإنت ؟

سالم بينه وبين نفسه : كان بنقوللها انى برفانقو وندره الكبد بتفوتنى وتصكر عليا

سالم : انى واعوذ بالله من كلمة انى ابيض وشعرى رطب هلباااااااااااااا وخشمى صغير و واقف وعيونى عاديات لكن ماشيات معاى وجسمى معبي لأنى نتمرن فى الحديد

نورهان : شكلك طرف وماشاء الله عليك

سالم : الحمد الله على كل شى

نورهان : ايه صح الحمد الله على كل شى

سالم : وين تقرى انتى ؟

نورهان : نقرا فى الجامعة فى كلية العلوم

سالم : إن شاء الله با التوفيق

نورهان : وانت شنى تقرا و تخدم ؟

سالم : اه اه انى ,, نخدم فى شركة نفط

نورهان : كويس معناها مستريح

سالم : الحمد الله ,, تعرفى يا نورهان استريحتلك هلبا

نورهان : حتى انى إستريحتلك يا سلومة

سالم : ما عندكش صاحب انتى ؟

نورهان : كان عندى وفُتّه على خاطر لقانى واقفه على ولد يقرا معاى

نورهان بينها وبين نفسها : إييييييه بالله كان واحد لقانى واقفه عليه كله باهي

سالم : اكيدة يغار عليك

الفتاة : اه ايه ايه ,, وإن شاء الله إنت مش زيّه بس

سالم : لالا انى free

سالم بينه وبين نفسه : أوقفى والا قعمزى و اني شني دخلنى بيك إتقولي بنتزوجك توا !!

نورهان : مليح

سالم : خلاص شنى نتلاقوا ؟؟

نورهان : باهي وين ؟

سالم : نجيك الجامعة غضوة

نورهان : باهي لكن الاسبوع اهوا اهنى ما عنديش ل الأحد

سالم بينه وبين نفسه : باهي هو اليوم الاربعاء وغدوة جمعة ما نخدمش والسبت نخدم ,, مليح اهو حتى نتصل بيها نقوللها كيف نعرفها واهو نربطوا على طرحة مليحة من واحد من ولاد الشارع

نورهان : اه وين سرحت يا عمري

سالم : معاك معاك يا عمرى ,, باهى خلاص نتصل بيك السبت زى الوقت اهوا ونتفاهموا على كل شى ,, و توا تصبحي على خير

نورهان : اوكى ,, وانت من أهل الخير

::::
::

سالم : اهوا جى السبت خلى نتّصلو ب نورهان ونربطوا على غدوة

جاري الاتصال ,,

::::
::

هاتف نورهان فى حالة إنتظار

وتهدرز على صاحبها التانى

:::::
::

سالم : فى منو تكلم أهيا فى عقابات الليل

جاري الاتصال ,,

اهو ينادي مليح

سالم : الووووو نورهان

نورهان : ايه

سالم : انى سالم يا نورهان

نورهان : ايه عرفتك شنى امورك

سالم : الحمدالله ,, تعرفى استاحشتك هلبااا

نورهان : حتى انى استاحشتك

سالم : تليفونك كان إنتظار فى منوا كنتى تكلمي !؟

نورهان : اه اه ,, هادى صاحبتى كانت تكلم فيا وقالتلى جيبيلى معاك الشيت متاع الجيلوجيا

سالم : اااااااااااااه به

نورهان :اه شنى بتلبسلى سلومة غضوة

سالم بينه وبين نفسه : بنصهد البدي الازرق متاع سراج و السروال الاكحل متاعه ,, والسبيدروا متاع وسام ,, مليح بكل

نورهان : اه سلومة إنت قاعد

سالم : إيه إيه قاعد ,, غير كنت إنفكر نلبسلك البدلة الطليانية ولا الامريكية ؟

ولا إنقلوك خلي إنجي عادي وخلاص توا نلبس بدي ازرق وسروال اسود

نورهان : والبس معاهم نظارة شمسية باش نعرفك بيهم يا سلومة

سالم : تي من وين بنجيبلها النظارة توا اهيا

الفتاة : اه

سالم : اوكي اوكي ما فيش مشكلة يا حياتي توا نلس وحدة من نظاراتي

::::
::

ويجي اليوم الموعود ,,

سالم وبنقّال N70 خذاه بلقوة من واحد من الاولاد شارعه

سالم : الو نورهان

نورهان : خير يا سالم

سالم : وين قاعدة توا إنتي ؟

نورهان : اني قاعدة قدام الكفتيريا متاع العلوم

سالم : وحتي اني قاعدة غادي

نورهان : اهوني اهوني إنشوف في واحد لابس بدي ازرق وسروال اكحل

سالم : إيه اني اهوا

:
::
:::
::
:

ويتلفت سالم ,, ويشبح نورهان ,, وهي تشبحه

:
::
:::
::
:

نأسف الخدمة مُشفرة ,, نرجوا تجديد الاشتراك

منور خوي بارك الله فيك

موضوع حلووووو يا موها
بس وين النهايه ههههههه
في انتظر الجزء الثاني
غاضب

ههههههههههههههههههههههههه
بجد عملة
يسلمو موها على القصة المضحكة
اضحك

المزيد من الابداع والتألق موها منور

قصة حلوةههههههه