خش وهدرز معانا

السلام عليكم ورحمة الله
جعل الله ايامكم سعادة

اخوتي اخواتي عندي موضوع ياريت يكون فيه روح الحوار والنقاش

وكل واحد يعطي

برايه اللي يشوفه وليك حرية الحوار والرد

الموضوع يدور حول اجواء رمضان في بلدنا الحبيبة موضوع حلو نتحاور فيه كأننا

في جلسة عربية

شني رايكم نهدرزو علي الايجابيات والسلبيات اللي نشوفها في هذا الشهر

ونقارن اجواء رمضان في ليبيا بالدول الاخرى

وشني الاقتراحات اللي نقترحوها حتى يكون رمضان شهر الخير والبركه

والتسامح والمغفرة

ياريت تكون الهدرزة من الواقع اللي صاير لينا

في النهاية ان شاء الله الموضوع يكون حلو ومهم للنقاش

تقبلو مني فائق الاحترام وكل العام والجميع بخير

اولا سامحني اختي علي التعديل في الموضوع بس ليكون منسق فقط

وثانيا :: موضوع رائع يحكي علي عاداتنا وتقليدنا وياريت نلقي تفاعل من الاعضاء

وتحياتي لك اختي

ولا يهمك دوشه اهم شيء يكون الموضوع بصورة جيدة للقاريء
وان شاء الله نلقو الحوار والنقاش المفيد والرد الجيد

الشلام وعليكم شنحالكم شنخباركم

دوشه شن حالك صحه فطورك

والله موضوع حلووو كويس فيه ايفاده كويسه الي الاعضاء

المهم قبل مانبدو في هدرزة جيبووو طاسة امياه خلي نشربوها وانتوو بكل

مدايرين مربوعه من غير حتي مكيف يضرب فينا الصهد شني يادوشه مستخسر فينا مكيف

يلا حتي هكي كويس المهم شن موضوعكم اليوم

يلي تبوو تهدرزو فيه يا عويله

ههههههههههههههههه
شني بدير صاحب المنتدى بخيل مخلينا في النو عملة وبعدين الميه بتجيبها جومانا بس عطلت البنت شكلها تجيب فيها من بير

بنهدرزو علي ظاهرة الاسواق في رمضان الايام الاولى طبعا بعدين نمشو للأيام الاخيرة شني رايكم

اوكيز تماموو موضوعو حلوو

الاسواق في رمضان في ليبيا طبعااا قبل رمضان بي ايام تلقي ناس في محلات لماعين تلقيهم يشروو كل عام
ياخدوو في صواني وظناجر بس في حاجه مش عارفه
علاش ناس تشري كل عام ومع انها عندها الاشياء هدة واحدلو بيشري كل عام ظناجر وصواني يعني فاتح محل في حوشه
وفيه من يغير في طاقم الاكل بتاع الحوش ايكسر الاول ويشري تاني
وهاكدا كل عام وفيه من يشري ويدس هدا بنسه الي الاسواق الماعين
اما الاسواق التانيه سوق المواد الغدائيه فا هدا ضروري منها لانه كل شخص يستحق الي مواد الزمه يلي يبهاا في مظبخ من سكر وملح وزيت وطمام وطبعا من غير الاشياء الاخري

سؤال وان شالله نلقي الاجابه عندكم

هل مصاريف هيا نفسها في شهر رمضان نفسها في ايام الاخري ؟؟؟؟؟

السلام عليكم تقولو ماتعرفونيش انا بخيل

المهم ماعلينا نمشوها يانانو

قلت ياموها علي الاسواق شهر رمضان شهر القراءن يعني الناس واخدينها بالعكس

كلها مصاريف والاكل وجو هذا المشكلة لما تمشي تلوح في الكناسة حشاكم انت رافع شكارة قرشين
بتلوحها ومتحشم تقول كبيرة بعدين تشبح واحد جايب طانطة بجرار

شنو هذا ماكلة والا مجاعة والا فلوس زائدة والا اسراف قلولي ياناس

والاسواق في بداية الشهر يشدوها الناس امعاين وحاجات المطبخ في منهم كل سنة
يغير في ديكور
المطبخ امتعه قالك رمضان رمضان شد المصحف واقرا

علي العموم لا مش نفس المصاريف ياموها انت مرات راجل العائلة الايام العادية يتقتل علي ربع جني لكن في رمضان يبزعق فيهم تي ماعلينا ياشرير مادورش

[b]وعليكم السلام ورحمة الله
فعلا كلامك موها الناس في الاول تلقاهم علي محلات الماعين والمواد المنزلية وتقول في منازلهم ما فيش شيء؟ ولا مش عارفة كيف كانو يطبخو
وأكيد مصاريف رمضان مش زي مصاريف الشهور الاخرى شني السبب !!؟؟ وليش ؟؟؟
هذا سؤال يسئله اي واحد لنفسه
اني بنقول ليش الاسراف هذا والناس ليش ادير هكي بس في نفس الوقت نلقى نفسي تلقائيا في نفس التيار
تيار الصرف والاسراف لان هكي تعودنا وهكي عشنا رمضان
تو نسئلك انت موها ودوشه لو جي موعد الافطار وما شفتش هاديكا البسبوسة والمهلبية والبيزا والبوريك وضولمة والطواجين المشكلة والهمبورغر والطابونه وغيرها وغيرها اكيد تقول هذا فطور ؟؟ ومش ح يعجبك نبي اجابة صح او لا وبصدق
دوشه كلامك مزبوط بس هات من يعمل بيه في ناس تقراء في القرآن والحمد لله وتختم في القرآن وتصلي صلاتها وتقيم الليل
وفي ناس عايشة رمضان زي بقية الاشهر الثانية مع ان رمضان شهر المغفرة والعتق من النار
للحديث بقيه خلي نوتي السحور هههههههه
[/b]

نانو عادت حليمة الي عادتها القديمة

وين موها ودوشه نستنى في الرد على سؤالي وإلا بتهربو
غاضب

السلام وعليكم من جيد وكيف حالكم

والله يانانو لو فيه هد كله اكيد بيعجبني لانه واحد صايم ويبي يعبي بطنه
يعنلي لو يلقي هدا كله اكيد بياكل حتي لو مايبيش ياكل ياكل علي خاظر الناس يلي وقفت في مظبخ لانه مش معقوله بعد ماوقفو ودارو هدا كله انجي في الاخير انقلهم مش عجبني الفطور

وعليكم السلام ورحمة الله اهلين موها
اهاااا اوك يعني انتم مش ضد عدم الاسراف لان في هلبة يحبو السفرة المشكلة ولو ما فيش الطبق هذا والثاني وغيره يقول هذا فطور في رمضان؟
يعني هادي عادة فينا او طبع خدينا عليه ؟؟؟

السلام عليكم

اهلين بي موها ونانو

اكيد مافيش حد ما يحبش السفرة مشكلة

بس انا في نهاية الموضوع الاكل يمشي للكناسة حاشاكم

المهم في هلبه ناس ما ياكلوش

في ناس يرقدو جاعنين واحني نفطرو شبعانين

والله انا كان تفضل حاجة مش حنلوحها لو في حد محتاجلها

وسلاااااااااااااااامز

رد جميل وحوار اجمل
وللحديث بقية

بالنسبه ليا انا رمضان السنة اللى فاتت احسن مكنتش نخش ع النت فا قريت المصحف مرتين اما توة مازلت في سورة الكهف من النت واما غيرى والله نصهم فاطرين في عمال في بنغازى يفطرو وينابشو في البنات كانه فطر مش محترمين حد رمضان للعبده مش للنت والدهورة في الاسواق

السلام عليكم
كيفكم كلكم ان شاء الله تمام التمام

والله مادام دلوعتي بخير احنا بخير

وينكم وينكم يا اعضاء يا حلوين

السلام عليكم ورحمة الله

كيف حالكم يااعضاء